ഹോളിവുഡ് സൂപ്പര്‍താരം ടോം ഹാങ്ക്സിനും (63) ഭാര്യ റീത വില്‍സണും കൊറോണ സ്ഥിരീകരിച്ചു. ആസ്ട്രേലിയയില് ഐസൊലേഷന്‍ വാര്‍ഡില്‍ നിരീക്ഷണത്തിലാണ് ഇരുവരും. കൊറോണ വൈറസ് പരിശോധനാഫലം പോസിറ്റീവ് ആണെന്ന് ഹാങ്ക്സ് തന്നെയാണ് ട്വിറ്ററിലൂടെ അറിയിച്ചത്.
‘ഞാനും റീതയും ആസ്ട്രേലിയയിലാണ്. ജലദോഷവും ശരീരവേദനയും ചെറിയ പനിയും കാരണം ഞങ്ങള്‍ രണ്ട് പേരും ക്ഷീണിതരായിരുന്നു. കാര്യങ്ങള്‍ ശരിയായ രീതിയില്‍ പോവേണ്ടതുകൊണ്ട് കൊറോണ വൈറസ് ബാധയുണ്ടോ എന്നറിയാനായി ടെസ്റ്റ് ചെയ്തു. ഫലം പോസിറ്റീവാണ്’.
‘മെഡിക്കല്‍ പെരുമാറ്റച്ചട്ടം നിര്‍ബന്ധമായും പാലിക്കേണ്ടതുണ്ട്. പൊതു ജനാരോഗ്യവും സുരക്ഷയും കണക്കിലെടുത്ത് ഞങ്ങള്‍ നിരീക്ഷണത്തില്‍ തുടരും. കൂടുതല്‍ വിവരങ്ങള്‍ ട്വിറ്ററിലൂടെ അറിയിക്കുമെന്നും കുറിപ്പില്‍ പറയുന്നു. അമേരിക്കന്‍ ഗായകനും നടനുമായ എല്‍വിസ് പ്രിസ്‌ലിയുടെ ജീവിതം പ്രമേയമാക്കുന്ന സിനിമയില്‍ അഭിനയിക്കാനാണ് ടോം ഹാങ്ക്സ് ആസ്ട്രേലിയയില് എത്തിയത്. സ്‌പ്ലാഷ്, ബാച്ചിലര്‍ പാര്‍ട്ടി, കാസ്റ്റ് എവേ, അപ്പോളോ 13, ക്ലൗഡ് അറ്റ്‌ലസ്, ബ്യൂട്ടിഫുള്‍ ഡേ ഇന്‍ ദ നെയ്ബര്‍ഹുഡ് തുടങ്ങി നിരവധി സിനിമകളില്‍ ഹാങ്ക്സ് അഭിനയിച്ചിട്ടുണ്ട്.